日本櫻花｜日本櫻花預測｜日本櫻花 2024｜日本櫻花季即將開始！日本氣象株式會社最近公布咗2024年日本各地嘅櫻花開花日預測圖，受最近天氣影響比早前嘅預想日子又再推遲。預計最快3月24日東京就會開花！福岡3月23日、大阪3月25日！大家買咗機票去日本賞櫻未呢？
日本氣象株式會社、Weather News 公布最新2024櫻花預測圖！東京預計3月20日就會開花！
各地預計開花日期如下：
- 福岡：3月23日
- 名古屋：3月22日
- 東京：3月24日
- 大阪：3月25日
- 札幌：4月29日
▼各地預計櫻花開花日期
其他地區預測開花日期：
- 高知：3月20日
- 廣島：3月23日
- 和歌山：3月25日
- 京都：3月24日
- 鹿兒島：3月29日
- 金沢：3月11日
- 長野：4月7日
- 仙台：4月1日
- 青森：4月19日
提提大家，以上只係預測開花嘅日期，通常被認為最靚嘅「滿開日」係距離開花日大概一個星期後。而滿開日後過幾日就會迎來櫻花落下嘅「吹雪期」，亦都係另一種美景！
▼預計各地「滿開日」日期
【關東地區】
東京——新宿御苑
位於東京市區嘅新宿御苑交通非常方便，因此係唔少當地人以及遊客嘅首選，無論賞櫻定係賞楓葉都係一個好地方。而且因為新宿御苑嘅櫻花樹品種比較多，所以賞花期一般較其他地方長。
▼新宿御苑
新宿御苑
東京——上野恩賜公園
上野恩賜公園亦係一個東京市區賞櫻嘅好選擇，同樣深受日本人喜愛。每年櫻花季都會有大約800棵櫻花樹綻放，非常壯觀，唔少民眾會一邊野餐一邊賞櫻。
▼上野恩賜公園
上野恩賜公園
- 地址： 東京都台東区上野公園 (地圖)
- 開放時間：5am – 11pm
- 電話：+81 338285644
- 上野恩賜公園官方網站
每年櫻花季，古式神道櫻神宮都會推出期間限定嘅櫻花款式御朱印，今年2月就推出咗兩款御朱印，以櫻花粉紅色為主調，設計好靚啊！唔知3月嘅款式會係點呢？另外，古式神道櫻神宮嘅蕾絲御守亦非常出名，不過因為無貨，4月1日起先會重新開始發售。 近日官方發佈咗唔少圖片，見到櫻神宮內已經開滿河津櫻花，係賞櫻嘅好地方！大家更可以以500日圓 (約$26) 購入粉紅色絲帶，寫上自己嘅願望後綁喺櫻花樹上！古式神道櫻神宮位於東京世田谷區櫻新町，最方便就係由澀谷乘坐東急田園都市線至櫻新町站落車。
古式神道櫻神宮
- 地址： 東京都世田谷区新町3-21-3 (地圖)
- 開放時間：9am – 5pm
- 電話：+81 334290869
- 古式神道櫻神宮官方網站
東京——隅田公園
隅田公園位於淺草站附近，喺「吾妻橋」與「櫻橋」之間。沿隅田川步行至隅田公園期間，可以欣賞隅田川兩岸約450棵櫻花樹。到達隅田公園後，雖然櫻花樹數量唔算密集，不過勝在可以欣賞埋晴空塔嘅景色。
▼隅田公園
隅田公園
東京近郊——河津櫻花祭
河津町觀光協會宣布，今年嘅「河津櫻花祭」將會喺2月1日至29日舉行，每晚6點至8點仲會進行點燈！河津櫻源自靜岡縣伊豆半島河津地區，最大特色係2月上旬已經開始綻放，比日本多數地方嘅櫻花花期早足足約一個月！避開3、4月嘅賞櫻旺季人潮～ 好多人都話非常值得去！喺河津地區有8,000棵櫻花樹，開花嘅時候周圍都變成一片粉紅色，沿路嘅小食攤檔仲會販賣櫻花鯛魚燒、櫻花雪糕，少女心爆發！由東京出發，乘坐踴子號列車 (踊り子) 約2小時30分鐘就可直達河津。
河津櫻花祭
大阪——大阪城公園
大阪城公園位於大阪府中央，唔止交通方便，規模仲非常大。園內嘅西之丸庭園種植咗約300棵櫻花樹。除咗可以賞櫻之外，仲可以順便參觀大阪城天守閣等歷史性建築。
▼大阪城公園
大阪城公園
大阪——大阪造幣局
大阪造幣局以「櫻花大道」聞名，種植嘅櫻花樹多達125種，每年四月中旬都會有約一星期時間對外開放，等民眾可以入內賞櫻。不過今年嘅確實開放日期仲未公布，想去賞櫻就要密切留意住啦！
▼大阪造幣局
大阪造幣局
萬博紀念公園除咗以由藝術家岡本太郎擔任製作嘅「太陽之塔」聞名之外，仲係一個熱門嘅賞櫻勝地。萬博紀念公園種植超過5000棵櫻花樹，佈滿成條道路，非常壯觀。園內仲設有博物館、餐廳、日式庭園等設施，賞完櫻都唔怕無嘢做。
▼萬博紀念公園
如果打算去大阪賞櫻，記得去大阪萬博公園櫻花祭！大阪萬博公園櫻花祭於3月20日至4月4日舉行，公園內種植超過5000棵櫻花樹，包括染井吉野櫻、彼岸櫻、寒緋櫻等，被獲選為「日本櫻名所 100 選」。日頭仲有美食攤位及手工藝攤檔，而晚上更會有花火大會、夜間櫻花大道，好有氣氛啊～
萬博紀念公園
- 地址：大阪府吹田市千里万博公園 (地圖)
- 開放時間：9:30am – 5pm；逢星期三休息
- 電話：+81 668777387
- 萬博紀念公園官方網站
哲學之道係一條步行道，位於京都市左京區，鄰近知名嘅銀閣寺、南禪寺。春天有盛開嘅櫻花、秋天有紅葉，因此被選為日本百大街道之一。而且因為係一條街道，所以不設開放時間，隨時想去都得。當櫻吹雪嘅時候，花瓣散落喺河面上，喺呢度散步心情都好啲。另外，呢度有唔少貓咪出沒，愛貓之人行行下隨時有驚喜！
▼哲學之道
哲學之道
- 地址：京都府京都市左京區 (地圖)
京都——二條城
位於京都嘅二條城係世界文化遺產，以華麗嘅宮廷建築、庭園風景聞名，係唔少遊客到訪京都嘅必去景點，每逢櫻花季人潮就更誇張。城內超過400棵櫻花盛開，配合二條城建築物嘅風景，非常古色古香。
▼二條城
二條城
【九州地區】
福岡——舞鶴公園
舞鶴公園鄰近福岡市區，係福岡市內賞櫻最著名嘅地方之一。除咗有過千棵櫻花樹之外，每逢櫻花季呢度仲會有「福岡城櫻花祭」，有唔少特色攤檔，非常熱鬧。
▼舞鶴公園
舞鶴公園
福岡——淺井一本櫻
一般常見嘅賞櫻勝地都係以櫻花樹數量眾多而聞名，但係淺井一本櫻就恰恰相反。呢度只有一棵樹齡超過100年嘅櫻花樹，喺1986年被指定為市內嘅保持樹木，受到當地人悉心保護，可以話係寶貴嘅綠化財產。除咗欣賞櫻花樹本體之外，仲可以打卡映照喺池面上嘅「倒立櫻花」，好似天空之鏡咁，非常特別。
▼淺井一本櫻
淺井一本櫻
- 地址：久留米市山本町耳納1511-1 (地圖)
- 開放時間：24小時
長崎——大村公園
大村公園係玖島城嘅遺跡，同時亦係日本櫻花名所百選及日本歷史公園百選之一，可以話係長崎縣首屈一指嘅賞花景點。呢度有超過2,000株以上嘅櫻花，更有當地獨有嘅櫻花品種「大村櫻」。
▼大村公園
大村公園
熊本——熊本城
講到喺熊本縣賞櫻，點可以少得最有代表性嘅熊本城呢！熊本縣被阿蘇山等氣勢宏偉嘅自然景觀包圍，係一座已經有約400年嘅城堡。春天時城內嘅櫻花盛開，壯觀嘅城堡映照著粉紅色嘅櫻花，非常漂亮。
▼熊本城
熊本城
【北海道地區】
北海道——圓山公園
圓山公園位於札幌市區，係北海道嘅賞櫻勝地。去圓山公園嘅話一定要去公園入面嘅北海道神宮，因為氣候緣故，呢度係全日本少數有機會睇到櫻花、梅花同時盛開嘅地方。
▼圓山公園
圓山公園
北海道——松前公園
松前公園因為位於北海道嘅最南端，所以係北海道內櫻花相對比較早盛開嘅地方。園內種植過萬棵櫻花樹，仲有各種各樣嘅歷史遺跡，櫻花季嘅時候仲會舉辦櫻花祭典！
▼松前公園
松前公園
【中部地區】
名古屋——名古屋城
名古屋城除咗係一個著名嘅歷史古蹟之外，同時亦係一個賞櫻嘅好地方。喺櫻花季嘅時候，呢度有過千棵櫻花樹綻放，以名古屋城作為背景，配上象徵日本嘅櫻花，非常有日本風情。
▼名古屋城
名古屋城
名古屋——東山動植物園
東山動植物園唔止係日本第三大動物園，仲係唔少人選擇賞櫻各地方。植物園嘅「櫻花迴廊」入面有超過100棵櫻花樹。賞完櫻仲可以順便去埋動物園，適合一家大細去玩！
▼東山動植物園
東山動植物園
- 地址：愛知県名古屋市千種区東山元町3丁目70 (地圖)
- 開放時間：9am – 4:30pm；逢星期一休息
- 電話：+81 527822111
- 東山動植物園官方網站
